Kubah Asta Tenggi

Polo Madura, otamaepon Songennep, kasohor kalaban sejarahepon. Contoepon sejarah masokna Cina dha' ka paseser Lombang tor daddi manossa pribumi neng daerah satempat, sejarah pembangunan Masjid Jamik sesamangken anyama Masjid Agung Songenneb, sejarah pembangunan kubah Asta Tenggi, sareng samacemma.
Asta Tenggi enggi paneka settong tana otaba bangonan se ebadhi kennengngan pasarean otaba koburan oreng-oreng kahormat neng e Songenneb. Edhalem epon banne coma settong tana pasarean malolo. Nangeng e ka' dissa' jugan badha kennengngan kaangguy para juru kunci, kennengngan badhi oreng-oreng awudhu', sareng se otama enggi paneka bangonan congkop se badha neng e bagian Temor kompleks pasarean kasebbut.
Lamba', salastare epon Bindara Saod otaba R. Tumenggung Tirtanegara paleman dha' ka rahmatullah e tanggal 17 Jumadil Awal 1171H (1762M), tahta epon epatoron dha' ka potra epon se asmaepon R. Asiruddin se agellar Pangeran Natakusuma I otaba se kasebbut kalaban Panembahan Somala. Raden Arya Asiruddin e lantik pas enobaddhagi daddi Adipati Songennep e taon 1762M, kalaban gelar Pangeran Natakusuma dhari Gubernur Jendral Petrus Albertus Vander Parra.

E masa pemarenta'an epon, Panembahan Somala bannya' nyepta'agi pembangunan. Misalla pembangunan Keraton se anyar tor pembangunan Masjid Jamik otaba Masjid Agung Songennep. E bakto Panembahan Somala ampon aomor toa, beliau egante kalaban potra epon, Sultan Abdurrachman Pakunataningrat. Kaangguy ngahormadhi dha' ka rama epon, Sultan Abdurrachman Pakunataningrat abadhi bangonan congkop e Asta Tenggi se badha e bagian temor kompleks pasarean kasebbut. Bangonan akubah ka' dhinto molae e bangon tanggal 10 Rajjab 1227H (1808M). Nangeng PanembahanSomala adhinggal omor e are sennin Rabiul Awal 1230H (1811M) tor emakammagi e nga' tengnga'an epon kubah kasebbut.
E baktoPanembahan Somala adhinggal dhunnya, saonggunna bangonan paneka ta' lerres lastare. Nangeng Sultan Abdurrachman terros usaha sopaja bangonan akubah kennengngan epon Panembahan Somala e makammagi paneka ceppet lastare kalaban bagus tor cellep manabi e oladhi soca.
Sabban, Asta Tenggi enggi paneka kennengngan epon pasarean raja-raja Songennep. Conto epon: pasarean Bindara Saod tor raji epon R. Ayu Tirtonegoro, pasarean Pangeran Pulang Jiwo tor raji epon Raden Ayu Artak, pasarean Pangeran Jimat, tor raja-raja laenna.